25 Қаңтар 2026
22 қаңтарда елордада 2026 жылдың 1 қаңтарында күшіне ене бастаған жаңа ұлттық стандарттар талқыланды. Дөңгелек үстел Zoom-да өтті және онлайн-саудадағы фулфилмент-орталықтарына қойылатын талаптарға және әлеуметтік маңызы бар азық-түлік тауарларын анықтау тәсілдеріне арналды.
Кездесуге мемлекеттік органдардың, әкімдіктердің, салалық қауымдастықтардың, бизнестің және басқа да мүдделі тараптардың өкілдері қатысты.
Сарапшылар ҚР СТ 4027-2025 «Электрондық сауда саласындағы фулфилмент-орталықтар. Жалпы талаптар» және ҚР СТ 4014-2025 «Әлеуметтік маңызы бар азық-түлік тауарларын анықтау жөніндегі нұсқау» стандарттары не үшін енгізілгендігі, олар қандай міндеттерді шешетіндігі және практикада қалай қолданылатын болатындығы туралы толық айтты.
Атап айтқанда, қатысушыларға фулфилмент-орталығы тауармен жұмыс істеудің толық циклін — қабылдау мен сақтаудан бастап жиынтықтауға, буып-түюге, жеткізілімге және қайтарымды өңдеуге дейін қамтитынын, сондай-ақ маркетплейстермен және төлем жүйелерімен интеграциялауды көздейтінін түсіндірді. Қойма жабдығын, буып-түю желілерін және өлшеу құралдарын қоса алғанда, осындай орталықтардың инфрақұрылымы мен жабдықталуына қойылатын талаптарға ерекше назар аударылды.
Екінші стандартты талқылау аясында сарапшылар қандай тауарлардың әлеуметтік маңыздыға жататынын және оларды анықтау кезінде қандай өлшемшарттарды пайдаланылатынын түсіндірді. Мысал ретінде базалық азық-түлік тауарлары — ұн, нан және макарон өнімдері, сондай-ақ олардың сапасына, қаптамасына және таңбалануына қойылатын талаптар қарастырылды. Сондай-ақ, өнімнің сәйкестігін тексеру әдістері — көзбен шолып бақылаудан бастап құжаттарды және тауарларды сәйкестендіру жүйесін талдауға дейін ұсынылады.
Қатысушыларға жаңа талаптарды енгізу онлайн-сауданың дамуына қалай әсер ететіні, нарықтық процестердің ашықтығын арттыратыны және тұтынушылардың мүдделерін қорғауға көмектесетіні түсіндірілді. Бизнес үшін бірыңғай қағидаларды қалыптастырудағы стандарттардың рөлі жеке талқыланды.
— Стандарттар — бұл формальдылық емес, ол бизнестің тұрақты жұмыс істеуіне, ал тұтынушылардың өздерін қауіпсіз сезінуіне көмектесетін түсінікті ойын қағидалары, — деп атап өтті пікірталас қатысушылары.
Дөңгелек үстел ашық диалог форматында өтті: қатысушылар практикалық сұрақтар қойып, мамандардан түсіндірулерді ала алды. Кездесу қорытындысы бойынша жаңа стандарттардың өзектілігі және оларды енгізуді одан әрі ақпараттық сүйемелдеу қажеттілігі атап өтілді.
