16 Қазан 2025
16 қазанда Астанаға жұмыс сапарымен Халықаралық стандарттау ұйымының (ISO) Бас хатшысы Серхио Мухика келді. Әуежайда оны «ҚазСтандарт» РМК басшысы Мәлік Сәулебай қарсы алды.
Делегацияны ұлттық қонақжайлылықпен қарсы алды.
Сапар барысында Серхио Мухиканың Қазақстан Республикасы Үкіметі мен Сауда және интеграция министрлігінің басшылығымен, сондай-ақ Nazarbayev University алаңында академиялық қоғамдастық өкілдерімен кездесулері жоспарланған.
Қазақстан, Өзбекстан, Түркіменстан және Қырғызстан стандарттау жөніндегі ұлттық органдар басшыларының қатысуымен өтетін «Орталық Азия және ISO» өңірлік кездесуі орталық оқиғалардың бірі болып табылады.
ҚазСтандарт басшысы бұл сапардың стандарттау саласындағы халықаралық ынтымақтастықты дамыту үшін стратегиялық маңызы бар екенін атап өтті.
— ISO-мен өзара іс-қимыл Қазақстанға сыртқы нарықтардағы сенімді нығайту және отандық өнімнің бәсекеге қабілеттілігін арттыру үшін кең мүмкіндіктер ашады. Стандарттау – бұл тұрақты экономикалық өсім мен технологиялық прогрестің негізі, — деп атап өтті Мәлік Сәулебай.
Серхио Мухиканың Қазақстанға жұмыс сапары ISO мен Орталық Азия елдері арасындағы әріптестік байланыстарды нығайтуға, сондай-ақ стандарттау саласындағы өңірлік бастамаларды дамытуға бағытталған. Алдағы келіссөздер тәжірибе алмасу және қазақстандық мамандардың ISO халықаралық жұмыс топтарына қатысуын кеңейту үшін жаңа мүмкіндіктер ашады.
Анықтама
Халықаралық стандарттау ұйымы (ISO) — өнімдер мен көрсетілетін қызметтердің сапасын, қауіпсіздігі мен тиімділігін арттыруға бағытталған халықаралық стандарттарды әзірлейтін әлемдегі ең ірі құрылым. 1947 жылы 23 ақпанда құрылған. ISO штаб-пәтері Швейцарияның Женева қаласында орналасқан.
Қазақстан ISO қызметіне белсенді қатысады: еліміздің өкілдері 152 техникалық комитеттің құрамына кіреді. 2025 жылдан бастап Қазақстан ISO/ТК 34/ПК 6 «Ет, құс, жұмыртқа, балық және олардың өнімдері» және ISO/ТК 135/ПК 9 «Акустикалық эмиссияны сынау» хатшылықтарын бірлесіп жүргізеді. Бұл қатысу халықаралық стандарттарды әзірлеуге тікелей әсер етуге және ұлттық мүдделерді жаһандық деңгейде қорғауға мүмкіндік береді.
