28 Қараша 2025
Алматы қаласында Ахуалдық штаб отырысы өтті, онда мемлекеттік органдар өнімнің қауіпсіздігі және техникалық регламенттердің талаптарын сақтау мәселелерін талқылады, деп хабарлайды «ҚазСтандарт» РМК баспасөз қызметі.
26 қарашада Алматы қаласы әкімдігінде ішкі нарықты қауіпті өнімдерден қорғау және техникалық регламенттерге сәйкес келмейтін тауарлардың айналымға түсуіне жол бермеу мәселелері бойынша Ахуалдық штаб отырысы өтті. Отырыс қала әкімінің орынбасары Олжас Смағұловтың басшылығымен өтті.
Штаб жұмысына СИМ ТРМК, санитариялық-эпидемиологиялық бақылау, коммуналдық инфрақұрылым, сауда және тұтынушылардың құқықтарын қорғау бейіндік департаменттерінің, сондай-ақ Полиция департаментінің басшылары қатысты. ҚазСтандарттан Алматы қаласы және Алматы облысы бойынша филиал директоры Руслан Бекқожин қатысты.
Отырыста тамақ және парфюмерлік-косметикалық өнімдер, жеңіл өнеркәсіп тауарлары мен ойыншықтар саласындағы техникалық регламенттерді сақтау, сондай-ақ аттракциондар мен балалар ойын алаңдарының қауіпсіздігін қамтамасыз ету мәселелері қаралды. Мерекелік маусым қарсаңында пиротехникалық бұйымдардың айналымына қойылатын талаптар жеке талқыланды. Уәкілетті органдардың өкілдері ведомстволардың жауапкершілік аймақтарын түсіндірді, тексерулердің нәтижелерін және бірыңғай бақылау жүйесі шеңберіндегі өзара іс-қимыл тетіктерін ұсынды.
СИМ ТРМК Алматы бойынша департаментінің басшысы Д. Сәрсенбаев Үкіметтің №718 қаулысына сәйкес мемлекеттік бақылауды жүзеге асыратын органдардың құзыреттері туралы айтып берді. Алматы қ. СЭБД басшысының орынбасары Г. Каткенова тамақ өнімдерінің, косметиканың және балаларға арналған тауарлардың қауіпсіздігін мониторингілеу нәтижелері туралы баяндады. Коммуналдық инфрақұрылым басқармасының өкілі Ж. Қайырханов объектілерді түгендеу және аттракциондар мен балалар алаңдарының қауіпсіздігін арттыру бойынша жүргізіліп жатқан жұмыстар туралы хабарлады.
Сауда және тұтынушылардың құқықтарын қорғау департаменті жалған және қауіпті өнімдерді анықтауға бағытталған «Сапалы өнім» жобасының қорытындысын ұсынды. Полиция департаменті атынан Е. Узабаев пиротехникалық бұйымдар жөніндегі техникалық регламенттің талаптарын және бұзушылықтардың алдын алу шараларын түсіндірді.
ҚазСтандартта мемлекеттік органдардың үйлестірілген жұмысы ғана тұтынушыларды нақты қорғауды қамтамасыз етуге және нарықтағы өнім сапасын арттыруға мүмкіндік беретінін айта отырып, ведомствоаралық өзара іс-қимылдың маңыздылығын атап өтті.
Соңында қатысушылар ұсыныстармен алмасты және өнім қауіпсіздігі саласындағы бұзушылықтардың алдын алу жөніндегі қосымша шараларды талқылады.