14 Қараша 2025
ҚазСтандарт пен BSN Индонезияның ұлттық стандарттарына қол жеткізуді талқылады.
Ислам елдерінің стандарттар және метрология институты (SMIIC) Бас Ассамблеясының 20-шы отырысында Қазақстан делегациясы Индонезия ұлттық стандарттау агенттігінің (BSN) өкілдерімен кездесті.
Келіссөздер барысында тараптар Қазақстанға Halal, тамақ өнеркәсібі және сапа менеджменті жүйелері саласындағы құжаттарды қоса алғанда, Индонезияның ұлттық стандарттарына (SNI) қол жеткізуді көздейтін лицензиялық келісім жасасу перспективаларын талқылады.
Уағдаластықтарды іске асыру Индонезиялық стандарттарды ұлттық жүйеге бейімдеуге және оларды Қазақстандағы Halal-сертификаттау талаптары мен рәсімдерін үйлестіру үшін пайдалануға мүмкіндік береді.
– Индонезиямен ынтымақтастық Қазақстан алдында Halal стандарттау және сертификаттау саласында жаңа мүмкіндіктер ашады. SNI Индонезия жүйесі ислам әлемінде ең дамыған жүйелердің бірі болып танылды және оны біздің ұлттық тәжірибемізге интеграциялау халықаралық нарықтарда қазақстандық өнімдерге деген сенімді күшейтеді, – деп атап өтті «ҚазСтандарт» РМК бас директоры Мәлік Сәулебай.
Ол BSN-мен өзара іс-қимыл халықаралық әріптестікті дамытуда және ұлттық стандарттау жүйесінің әлеуетін нығайтуда маңызды қадам болатынын атап өтті.
