26 Тамыз 2025
Астанада «ҚазСтандарт» РМК ұйымдастырған, қоғамдық тамақтану саласындағы ұлттық стандарттауды дамытуға арналған дөңгелек үстел өтті. Іс-шараға ҚР Сауда және интеграция министрлігінің Тұтынушылардың құқықтарын қорғау комитетінің, Денсаулық сақтау министрлігінің Санитариялық-эпидемиологиялық бақылау комитетінің, қалалар мен өңірлер әкімдіктерінің туризм, кәсіпкерлік және индустриялық-инновациялық даму басқармаларының, сондай-ақ ҚР Қоғамдық тамақтандыру қауымдастығының, осы саладағы өзін-өзі реттейтін ұйымның және «Ақ Жол» шағын және орта бизнесті қолдау қауымдастығының өкілдері қатысты.
Қоғамдық тамақтандыру қызметтері саласындағы екі стандартқа басты назар аударылды.
Біріншісі — ҚР СТ ГОСТ Р 50762-2011 «Қоғамдық тамақтану қызметтері. Қоғамдық тамақтану кәсіпорындарын жіктеу». Ол Ішкі сауда қағидаларына (ҚР Ұлттық экономика министрінің м.а. 2015 жылғы 27 наурыздағы № 264 бұйрығы) сілтемелік құжат болып табылады және оны, атап айтқанда, «Royal Quality» ЖШС компаниясы қолданады.
Стандарт мекемелерге тағамдардың ассортиментіне, қызметкерлердің дайындық деңгейіне, қызмет көрсету жағдайларына және техникалық жабдықталуына байланысты өздерінің дұрыс жайғасуына көмектеседі. Тұтынушылар үшін бұл — қызметтің қандай деңгейін күтуге болатындығын алдын ала түсінуге мүмкіндік беретін бағыт.
2025 жылғы 1 қаңтардан бастап жаңа ерікті стандарт — ҚР СТ 3988-2024 «Қоғамдық тамақтану қызметтері. Тұтынушылардың тапсырысы бойынша қоғамдық тамақтандыру өнімдерін жеткізу. Жалпы талаптар» күшіне енді. Ол жеткізуді ұйымдастырудың бірыңғай тәсілдерін — тапсырысты рәсімдеуден бастап оны клиентке беруге дейінгі тәсілдерді айқындайды. Құжатта жеткізудің ықтимал форматтары (мейрамхананың өз күшімен, логистикалық қызметтер немесе операторлар арқылы), тасымалдау шарттары, буып-түю және санитариялық нормалар бойынша ұсынымдар, сондай-ақ курьерлердің жұмысына қойылатын талаптар сипатталған. Бүгінгі таңда осы стандарттың пайдаланушылары — «Ұлттық сараптау және сертификаттау орталығы» АҚ, «Metrology Group KZ» ЖШС және басқа компаниялар.
Қазақстандағы стандарттар ерікті сипатқа ие екенін атап өту маңызды. Оларды енгізу – қызмет сапасын, жұмыстың ашықтығын және клиенттердің сенімін арттыруға ұмтылатын кәсіпкерлердің таңдауы.
— Жеткізу нарығы өте тез өсіп жетілуде және стандарттар ғана бизнес пен тұтынушылар үшін бірыңғай қарым-қатынас тілін қалыптастыруға көмектеседі. Бұл қатаң ережелер емес, жоғары сапа стандарттары бойынша жұмыс істейтіндерге бәсекелестік артықшылық беретін құрал, — деп атап өтті ҚазСтандарттағылар.
Кездесуге қатысушылар стандарттарды қолдану өркениетті тамақтану нарығын дамытуға, тұтынушылардың сенімін нығайтуға және шағын және орта бизнестің бәсекеге қабілеттілігін арттыруға ықпал ететінін атап өтті.
Стандарттардың мәтіндерімен «ҚазСтандарт» РМК интернет-дүкенінен тегін танысуға және жүктеп алуға болады.