15 Қараша 2025
Ташкентте Қазақстан мен Халықаралық стандарттау ұйымы (ISO) өкілдерінің кездесуі өтті.
Ислам елдерінің стандарттар және метрология институты (SMIIC) Бас Ассамблеясының 20-шы отырысы аясында Қазақстан делегациясының Халықаралық стандарттау ұйымының (ISO) өкілі — ISO Central Secretariat мүшелік бөлімінің басшысы Джейми Стефенспен кездесуі өтті.
Келіссөздерге Қазақстан Республикасы Сауда және интеграция министрлігінің Техникалық реттеу және метрология комитетінің және «ҚазСтандарт» РМК-ның өкілдері қатысты. Тараптар ISO Бас хатшысы Серхио Мухиктің Астанаға сапарының қорытындыларын, сондай-ақ ISO мен Қазақстан арасындағы ынтымақтастықты дамыту жөніндегі алдағы қадамдарды талқылады.
Қазақстанның ISO халықаралық жобаларына қатысуын кеңейтуге және Орталық Азия елдерінің жаһандық стандарттау процестеріне қатысуын арттыруға ерекше назар аударылды.
«ҚазСтандарт» РМК бас директоры Мәлік Сәулебай ISO-мен жүйелі жұмыстың Қазақстан үшін стратегиялық маңызы зор екенін айтты.
– Біз Қазақстанның халықаралық стандарттау жүйесінің белсенді қатысушысы болып табылатынын көріп отырмыз. Серхио Мухиктің сапары және ISO-мен өткен келіссөздер біздің ұлттық жүйемізге деген сенімнің деңгейі жоғары екенін растайды, – деп атап өтті Сәулебай.
Кездесу қорытындысы бойынша тараптар халықаралық стандарттау жүйесі шеңберінде әріптестікті одан әрі нығайтуға және бірлескен бастамаларды дамытуға өзара мүдделілігін растады.