15 Қараша 2025
ҚазСтандарт» пен «Өзстандарт» сапа, метрология және атомдық технологиялар саласындағы ынтымақтастық бағыттарын келісті.
Ислам елдерінің стандарттар және метрология институты (SMIIC) Бас Ассамблеясының 20-шы отырысы шеңберінде ҚР Сауда және интеграция министрлігі Техникалық реттеу және метрология комитетінің Төрағасы Жанна Есенбекова, «ҚазСтандарт» РМК бас директоры Мәлік Сәулебай және «Өзстандарт» техникалық реттеу агенттігінің директоры Ақмал Жұманазаровтың кездесуі өтті.
Тараптар екіжақты өзара іс-қимыл және Қазақстан Республикасы мен Өзбекстан Республикасы арасындағы экономикалық ынтымақтастық жөніндегі үкіметаралық комиссияның отырысына «Жол картасын» дайындау мәселелерін талқылады.
Стандарттау, сәйкестікті бағалау, аккредиттеу және метрология саласындағы ынтымақтастыққа, сондай-ақ өңірлік және халықаралық ұйымдар шеңберінде тәжірибе алмасуға ерекше назар аударылды.
Негізгі бағыттардың бірі метрология және атом саласын дамыту, оның ішінде эталондық база құру және мамандардың біліктілігін арттыру болды.
Бірлескен жоба аясында «КазСтандарт» РМК өзбек тарапына газ ылғалдылығының бастапқы эталонын құруға консультациялық-әдістемелік көмек көрсетеді.
Қазақстандық сарапшылар жабдыққа қойылатын талаптарды анықтауға, оңтайлы техникалық шешімдерді таңдауға және эталондық жабдықпен одан әрі жұмыс істеу үшін қызметкерді оқытуға көмектеседі.
Осы эталонның негізінде жатқан шық пен қырау нүктесінің температурасын жаңғырту технологиясын ҚазСтандарт мамандары әзірлеген және ұлттық патентпен қорғалған.
— Қазақстан маңызды ғылыми-метрологиялық базаға ие және сараптаманы серіктестермен бөлісуге дайын. Өзбекстанмен ынтымақтастық өңірдегі заманауи сапа инфрақұрылымын дамыту үшін күш біріктіруге мүмкіндік береді, - деп «ҚазСтандарт» РМК бас директоры Мәлік Сәулебай атап өтті.
«Жол картасы» жобасына сәйкес, елдер бірлескен тренингтер мен тағылымдамалар өткізу, стандарттардың ұлттық базаларымен алмасу және стандарттау саласында цифрлық құралдарды дамыту туралы уағдаласты.
Кездесу қорытындысы бойынша тараптар халықаралық ұйымдар — SMIIC, ISO және COOMET шеңберінде әріптестік байланыстарды нығайтуға және ынтымақтастықты дамытуға өзара мүдделі екендіктерін растады.
