15 Маусым 2026
Қазақстан делегациясы «ҚазСтандарт» РМК бас директорының орынбасары Нұрбек Хабиевтің жетекшілігімен Еуро-Азиялық мемлекеттік метрологиялық мекемелер ынтымақтастығы комитетінің (КООМЕТ) 38-ші отырысына қатысты. Отырыс 11–12 маусым күндері Душанбе қаласында өтті. Нұрбек Хабиев үшін бұл Комитеттің жұмысына Қазақстан Республикасынан КООМЕТ мүшесі мәртебесінде алғашқы қатысу болды.
Отырыс барысында ол ұлттық метрология жүйесін дамытудың басым бағыттарын ұсынды. Олардың қатарында эталондық базаны нығайту, халықаралық ынтымақтастықты кеңейту, цифрлық шешімдерді енгізу және Қазақстанның өңірлік әрі халықаралық деңгейлердегі рөлін күшейту бар. Сонымен қатар КООМЕТ-тің өлшеу мүмкіндіктерін өзара тану және бірлескен жобаларды іске асыру үшін маңызды алаң ретіндегі рөлі атап өтілді.
Отырыс барысында КООМЕТ-ке мүше мемлекеттердің ұлттық метрологиялық институттары арасындағы ынтымақтастықты одан әрі дамыту, ұйым құрылымын жетілдіру, кадрлар даярлау және білім алмасу, сондай-ақ КООМЕТ қызметін цифрлық трансформациялау мәселелері талқыланды.
КООМЕТ ынтымақтастығын трансформациялау тұжырымдамасының жобасына ерекше назар аударылды. Сондай-ақ Стандарттау, метрология және сертификаттау жөніндегі мемлекетаралық кеңеспен өзара ынтымақтастықты дамыту, ұйымның бірыңғай ақпараттық ресурсын құру және оның құрылымдық органдары қызметінің тиімділігін арттыру мәселелері қаралды. Талқылау барысында өлшеу мүмкіндіктерін халықаралық деңгейде тану, халықаралық салыстырулар жүйесін дамыту және өңірлік метрологиялық ұйымдармен ынтымақтастықты кеңейту мәселелеріне де баса мән берілді.
Бағдарлама аясында Қазақстан делегациясының өкілдері «КООМЕТ тақырыптары: жаңа тәсіл» атты дөңгелек үстел отырысына қатысты. Қатысушылар бірлескен жобаларды іске асыру тетіктерін, жобалық қызметтің тиімділігін арттырудыжәне жобалардың CIPM MRA келісімі талаптарына сәйкестігі мәселелерін талқылады.
Отырыс аясында қазақстандық делегация шетелдің жетекші метрологиялық ұйымдарының өкілдерімен бірқатар екіжақты кездесулер өткізді. Түркияның TÜBİTAK UME, Словакия метрология институты және БелГИМ өкілдерімен келіссөздер жүргізілді. Тараптар ынтымақтастық перспективаларын, эталондық базаны жетілдіру, мамандар даярлау және заманауи технологияларды енгізуде тәжірибемен алмасудыталқылады.
Маңызды оқиғалардың бірі КООМЕТ еңбек сіңірген метрологтарын марапаттау рәсімі болды. «КООМЕТ Еңбек сіңірген метрологы» құрметті атағымен «ҚазСтандарт» РМК №1 зертханасының бас маманы Нұрлан Сексембаев марапатталды.
Қазақстандық делегацияның КООМЕТ іс-шараларына қатысуы метрология саласындағы халықаралық ынтымақтастықты нығайтуға, шетелдік серіктестермен кәсіби байланыстарды дамытуға және халықаралық алаңда еліміздің мүдделерін ілгерілетуге ықпал етеді.
