10 Маусым 2026
ҚазСтандарт пен SUNQAR фотобейнетіркеу жүйесін әзірлеуші қазақстандық өндірістің жол камераларын метрологиялық қамтамасыз етуді дамытуды талқылады.
«ҚазСтандарт» РМК Алматы қаласы және Алматы облысы бойынша филиалының басшылығы жол жүрісі қағидаларын бұзуларды фотобейнетіркеу зияткерлік жүйелерін әзірлейтін отандық SUNQAR компаниясының өндірістік алаңына барды.
Сапар барысында РМК өкілдері Қазақстанда толығымен құрылып жатқан аппараттық-бағдарламалық кешендерді әзірлеу және өндіру процесімен танысты.Отандық инженерлер оптикалық модульдерді, есептеу тақшаларын, корпустықконструкцияларды, сондай-ақ жасанды интеллект технологияларына негізделген бағдарламалық қамтамасыз етуді әзірлейді.
SUNQAR жүйесі жол жүрісі қағидаларын бұзудың 20-дан астам түрін анықтай алады. Олардың ішінде жылдамдықты арттыру, рульде телефонды пайдалану, тағылмаған қауіпсіздік белдігі, қиылыстардан өту кезінде бұзушылықтар, жол белгілері мен таңбалардың талаптарын, сондай-ақ сыртқы жарық аспаптарын пайдалану қағидаларын сақтамау.
Кешендер қиылыстарда, жол учаскелерінде және тұрақ аймақтарында орнатылады. Олар көлік құралдары қозғалысының жылдамдығын өлшейді, бекіту орнының координаттарын анықтайды және оқиғалардың уақыт параметрлерін тіркейді.
Өлшемдер нәтижелері жүргізушілерді әкімшілік жауапкершілікке тарту кезінде пайдаланылатындықтан, мұндай кешендер өлшем құралдарына жатқызылады және мемлекеттік метрологиялық бақылауға жатады. Көлік құралдарының жылдамдығын, кешендердің орналасу координаттарын және уақыт аралықтарын өлшеу мемлекеттік реттеу саласына жататын өлшемдер тізбесіне кіреді.
Осы бағыттағы метрологиялық қамтамасыз ету мәселелерімен құрамында аккредиттелген салыстырып тексеру және калибрлеу зертханасы жұмыс істейтін«Қазстандарт» РМК орталық кеңсесі, сондай-ақ Алматы қаласы және Алматы облысы бойынша филиалы айналысады.
Кездесу қорытындысы бойынша тараптар отандық фотобейнетіркеу жүйелерін метрологиялық қамтамасыз ету саласындағы ынтымақтастықтың перспективаларын талқылады. Филиал аккредиттеу саласын кеңейтуді және қазақстандық өндірістіңкамераларын тікелей ел аумағында салыстырып тексеру жүргізу үшін қажетті құзыреттерді дамытуды жоспарлап отыр.
Осы жоспарларды іске асыру ел ішінде қажетті метрологиялық рәсімдерді жүргізуге, шетелдік метрологиялық қызметтерге тәуелділікті азайтуға және өндірушілердің жабдықты салыстырып тексеруге жұмсайтын шығындарын азайтуға мүмкіндік береді.
