12 Маусым 2026
Қазақстан Республикасы Сауда және интеграция министрлігі Техникалық реттеу және метрология комитетінің «ҚазСтандарт» РМК ғалымдарды, оқытушыларды, зерттеушілерді және салалық мамандарды SMART ғылыми-техникалық журналында ғылыми материалдарын жариялауға шақырады.
SMART журналы 2021 жылдан бері ҚазСтандарт тарапынан шығарылып келеді және стандарттау, метрология, аккредиттеу, техникалық реттеу және сауда салаларындағы ғылыми білім мен практикалық тәжірибе алмасуға арналған мамандандырылған алаң болып табылады. Басылым Қазақстан Республикасы Ақпарат және қоғамдық даму министрлігінің Ақпарат комитетінде тіркелген. Тіркеу туралы куәлік № KZ70VPY00116915, 2025 жылғы 11 сәуір.
SMART ғылыми-техникалық журналы рецензияланатын басылым болып табылады. Онда түпнұсқа ғылыми зерттеулердің нәтижелері, талдамалық шолулар және практикалық кейстер жарияланады. Журналдың негізгі оқырман аудиториясы ғылыми ұйымдар мен ғылыми-зерттеу институттарының қызметкерлері, Қазақстанның, ТМД елдерінің және алыс шетелдердің жоғары оқу орындарының профессорлық-оқытушылық құрамы, сондай-ақ тиісті бағыттар бойынша мамандар, докторанттар мен магистранттар болып табылады.
Қазіргі уақытта ҚазСтандарт журналдың рейтингін арттыру және оны Қазақстан Республикасы Ғылым және жоғары білім министрлігінің Ғылым және жоғары білім саласындағы сапаны қамтамасыз ету комитеті ұсынатын ғылыми басылымдар тізбесіне енгізу бағытында жұмыс жүргізуде.
Жариялауға стандарттау, метрология, аккредиттеу, техникалық реттеу және сауда тақырыптары бойынша материалдар қабылданады.
Мақалаларды рәсімдеу талаптары, материалдарды ұсыну тәртібі және журнал қызметі туралы толық ақпарат SMART журналының ресми сайтында қолжетімді: https://smart-journal.ksm.kz/ru/
Қатысуға барлық мүдделі мамандар, зерттеушілер, оқытушылар, докторанттар мен магистранттар шақырылады.