2 Маусым 2026
Сиань қаласына жұмыс сапарының қорытындысы бойынша стандарттау, метрология, сынақтар, сертификаттау және қазақстандық экспорттаушыларды қолдау бағыттарында уағдаластықтарға қол жеткізілді.
«ҚазСтандарт» РМК өкілдері Сиань қаласында өткен 10-шы Жібек жолы халықаралық көрмесі мен Қытайдың Шығыс – Батыс ынтымақтастығы және инвестициялар форумына қатысты. Қазақстандық делегацияның Шэньси провинциясына жұмыс сапары 2026 жылғы 20–25 мамыр аралығында өтті.
Сапардың негізгі мақсаты — қытайлық әріптестермен бұған дейін қол жеткізілген уағдаластықтарды дамыту және өзара іс-қимылды практикалық жобалар деңгейіне шығару. Кездесулер барысында стандарттау, метрология, сынақтар, сертификаттау, сондай-ақ қазақстандық өндірушілердің сыртқы нарықтарға шығуын қолдау тетіктерін қалыптастыру мәселелері қаралды.
Сапар аясында ҚазСтандарт өкілдері Шэньси провинциясының Метрология институтымен, China Testing & Certification International Group, Research Institute of Highway, China Quality Certification Centre ұйымдарымен, сондай-ақ Қытай, Ресей және Қырғызстанның стандарттау саласындағы уәкілетті құрылымдарының өкілдерімен келіссөздер жүргізді.
Негізгі нәтижелердің бірі — Қазақстан, Қытай, Ресей және Қырғызстанның бейінді ұйымдары арасындағы төртжақты ынтымақтастық туралы меморандумға қол қойылуы. Құжат кәсіби диалогты дамытуға, тәжірибе алмасуға, стандарттау саласындағы тәсілдерді үйлестіруге және өңірлік өнеркәсіптік әрі сауда ынтымақтастығы шеңберінде бірлескен жобаларды ілгерілетуге бағытталған.
Халықаралық стандарттау мәселелеріне жеке назар аударылды. Тараптар ISO және IEC техникалық комитеттері шеңберіндегі өзара іс-қимылды, стандарттар бойынша ақпарат алмасуды, техникалық талаптарды үйлестіруді, сондай-ақ басым бағыттар бойынша құжаттарды бірлесіп әзірлеу мүмкіндігін талқылады.
Шэньси провинциясының Метрология институтына барған кезде қазақстандық делегация заманауи метрологиялық зертханалардың жұмысымен танысты. Қытай тарапы ұзындық, діріл, қысым және газ шығыны эталондары бойынша техникалық материалдар ұсынуға, сондай-ақ қазақстандық мамандардың тағылымдамадан өту мүмкіндігін қарастыруға дайын екенін білдірді.
China Testing & Certification International Group зертханаларында құрылыс материалдары, экологиялық талаптар және экспорттық нарықтарға бағдарланған өнімдер бойынша сынақ мүмкіндіктері таныстырылды. Қазақстан тарапы Қазақстан Республикасының аумағында бірлескен сынақ құзыреттерін дамытуға мүдделілік білдірді.
Research Institute of Highway ұйымымен интеллектуалды қосылған автомобильдерге арналған стандарттар, жүк көлігін сынау және электр көліктеріне арналған қуаттау станцияларын метрологиялық қамтамасыз ету салаларындағы ынтымақтастық перспективалары талқыланды. Тараптар жеке ынтымақтастық туралы меморандум әзірлеу мүмкіндігін де қарастырды.
China Quality Certification Centre ұйымымен сәйкестікті бағалау нәтижелерін тану, қазақстандық экспорттаушылардың ҚХР нарығына шығуын сүйемелдеу, сондай-ақ техникалық талаптар мен сертификаттау рәсімдері бойынша консультациялық тетік құру мәселелері талқыланды.
Халықаралық форум аясында «ҚазСтандарт» РМК Бас директоры Малик Сәулебай стандарттау мен метрологияның бүгінде сауда, өнеркәсіптік кооперация және инвестициялық өзара іс-қимылды дамытудың маңызды құралдарына айналып отырғанын атап өтті.
«Стандарттарымыз бен техникалық талаптарымыз неғұрлым үйлесімді болса, өңірдегі сауда, өнеркәсіптік кооперация және инвестициялық ынтымақтастық соғұрлым жылдам, қауіпсіз әрі тиімді дамиды», — деді ол.
Сондай-ақ сөз барысында Қазақстанның техникалық реттеу ұлттық жүйесін дамыту жөніндегі ақпарат ұсынылды. Бүгінде елімізде 76 мыңнан астам ұлттық стандарт қолданыста, Қазақстан өкілдері ISO-ның 152 техникалық комитетінің жұмысына қатысады, сондай-ақ ISO-ның екі техникалық комитетінің хатшылығын бірлесіп жүргізеді.
Кездесулер қорытындысы бойынша тараптар сапа инфрақұрылымы саласындағы бірлескен жобаларды дамыту, ұлттық референттік зертханаларды күшейту, сынақ хаттамаларын үйлестіру, сараптамалық білім алмасу және қазақстандық экспорттаушыларды қолдау бойынша жұмысты жалғастыруға келісті.