19 Маусым 2026
Санкт-Петербургте «ТМД үздік жас метрологы» атты бірінші Халықаралық байқаудың қорытындысы шығарылды. «Практикалық метрология» номинациясының жеңімпазы «ҚазСтандарт» РМК Ақтөбе филиалының бас маманы Таңшолпан Жұмағазиева болды.
Байқау 16-17 маусымда «Болашақ біздің қолымызда» атты IV Халықаралық жас ғалымдар мен мамандардың ғылыми-практикалық конференциясының алаңында өтті. Оны өткізу 2025 жылғы шілдеде ТМД Экономикалық кеңесі бекіткен «ТМД үздік жас метрологы» халықаралық конкурсы туралы ережеге сәйкес Стандарттау, метрология және сертификаттау жөніндегі мемлекетаралық кеңестің 68-ші отырысының шешімімен жарияланды.
Байқаудың негізгі мақсаты метрология саласындағы жас мамандарды қолдау, халықаралық ынтымақтастықты дамыту және тәжірибе алмасу алаңын құру болды. Қатысушылар ғылыми жұмыстарды ұсынды, практикалық тапсырмаларды орындады және ғылыми комитет алдында өз жобаларын қорғады.
Байқауға барлығы 61 өтінім келіп түсті. Қатысушылар қатарында Әзірбайжан, Беларусь, Қазақстан, Ресей, Түрікменстан және Өзбекстан өкілдері болды. Қазақстаннан үш өтінім берілді.
Байқау қорытындысы бойынша Таңшолпан Жұмағазиева Практикалық метрология» номинациясында бірінші орынды иеленді. Оған Еуразиялық экономикалық одақтың техникалық регламенттерінің талаптарын іске асыру шеңберінде газ хроматографиясы әдісімен тамақ өнімдеріне арналған полимерлі қаптамадағы бутилакрилат пен бутилметакрилаттың массалық концентрациясын өлшеу әдісін жетілдіру тақырыбындағы жұмысы жеңіс әкелді.
Метролог байқауға қатысу өзіне үлкен құрмет пен жауапкершілік болғанын атап өтті.
— Қазақстан Республикасының атынан осындай жоғары деңгейде өкілдік ету —үлкен құрмет пен жауапкершілік. Дайындық кезінде және байқаудың өзінде мен көптеген эмоцияларды бастан өткердім, өйткені қатысушылардың деңгейі өте жоғары болды. Бұл жеңіс жеке менің ғана емес, бүкіл Қазақстанның жеңісі. Баршаңызға қолдау көрсеткендеріңіз үшін алғыс айтамын және әріптестеріме халықаралық аренада елдеріміздің дамуына ықпал ететін жаңа идеялар мен жобаларды сәтті іске асыруды тілеймін, — деді ол.
