6 Қазан 2025
Елордада сарапшылар мемлекеттік органдар сайттарының жұмысын және деректерді қорғау мәселелерін реттейтін стандарттарды цифрлық дәуірдің жаңа сын-қатерлеріне сәйкес келтіру үшін қайта қарауды ұсынды, деп хабарлайды «ҚазСтандарт» РМК баспасөз қызметі.
Астанада «Цифрлық үкіметті қолдау орталығы» РМК базасында № 34 техникалық комитетпен бірлесіп «ҚазСтандарт» РМК ұйымдастырған дөңгелек үстел өтті. Іс-шараның мақсаты — ақпараттық технологиялар және мобильді телекоммуникациялық байланыс саласындағы ұлттық стандарттарда жазылған нормалар мен талаптарды түсіндіру.
Дөңгелек үстел мемлекеттік органдар мен салалық ұйымдардың, олардың ішінде Жасанды интеллект және цифрлық даму министрлігі, Өнеркәсіп және құрылыс министрлігі, Әділет министрлігі, Қорғаныс министрлігі, Экология және табиғи ресурстар министрлігі, Су ресурстары және ирригация министрлігі, сондай-ақ «QazIndustry» қазақстандық индустрия және экспорт орталығы» АҚ, «Транстелеком» АҚ, «Мемлекеттік техникалық қызмет» АҚ, «Ақпараттық және есептеу технологиялар институты» РМК, «Қазақтелеком» АҚ, «Кселл» АҚ, «ҰАТ»АҚ және т.б. өкілдерін біріктірді.
Дөңгелек үстел аясында үш ұлттық стандарт қарастырылды. ҚР СТ 1784-2019 ұялы байланыс қызметтерінің параметрлері мен сапа көрсеткіштеріне қойылатын талаптарды, сондай-ақ оларды сынау әдістерін белгілейді. ҚР СТ 2191-2023 инклюзивті цифрлық кеңістікті қалыптастыруға ықпал ете отырып, мүмкіндігі шектеулі адамдар үшін цифрлық ақпараттың қолжетімділік қағидаттарын айқындайды. ҚР СТ 2190-2012 мемлекеттік органдардың интернет-ресурстарының құрылымын, дизайнын және мазмұнын, сондай-ақ деректерді өңдеу орталықтары үшін ақпаратты қорғауға қойылатын талаптарды регламенттейді.
Талқылау барысында қатысушылар стандарттардың ережелерімен егжей-тегжейлі танысты. «QazIndustry» АҚ және «Мемлекеттік техникалық қызмет» АҚ өкілдері цифрлық трансформациялау мен киберқауіпсіздіктің қазіргі заманғы талаптарын ескере отырып, ҚР СТ 2190-2012 қайта қарауды ұсынды.