29 Қазан 2025
Қазақстан астанасында Орталық Азия елдерінің стандарттау саласындағы ынтымақтастығы жөніндегі Астана бастамасы мақұлданды, деп «ҚазСтандарт» РМК баспасөз қызметі хабарлайды.
Іс-шараға Қазақстан Республикасының Сауда және интеграция министрі Арман Шакқалиев, ҚР СИМ Техникалық реттеу және метрология комитетінің төрағасы Жанна Есенбекова, «ҚазСтандарт» РМК Бас директоры Мәлік Сәулебай, сондай-ақ Қазақстан, Қырғызстан, Түрікменстан және Өзбекстанның стандарттау жөніндегі ұлттық органдарының өкілдері қатысты.
Кездесудің басты нәтижесі Орталық Азия елдері арасында стандарттау саласындағы ынтымақтастықты нығайтуға бағытталған Астана бастамасын мақұлдау болды. Құжат өңір мемлекеттерінің техникалық реттеу және халықаралық стандарттарды қолдану саласында келісілген тәсілдерді әзірлеуге ұмтылысын көрсетеді. Қатысушылар өнімнің сапасы мен бәсекеге қабілеттілігін арттыру құралы ретінде стандарттардың маңыздылығын атап өтті, ISO-мен ынтымақтастықты кеңейтуге және ұлттық сарапшылардың оның техникалық комитеттері мен жұмыс органдарына қатысуын күшейтуге дайын екендіктерін білдірді. Цифрландыру, «жасыл» технология және тұрақты даму сияқты салаларда тәжірибе алмасуға ерекше назар аударылды.
ISO Бас хатшысы Серхио Мухика өңір елдерінің бірлескен дамуға деген сындарлы көзқарасы мен ұмтылысын жоғары бағалады.
— Біз Астанадағы кездесуде Орталық Азия елдері көрсеткен бастаманы және ынтымақтастық рухын құптаймыз. Біз олардың әлеуетті нығайтуға, ұлттық жүйелерді халықаралық стандарттармен сәйкестендіруге және ISO мүшелері арасындағы диалогты дамытуға деген ұмтылысымен бөлісеміз, — деп атап өтті Серхио Мухика.
Сондай-ақ, ол, Астана бастамасы Орталық Азиядан келген қатысушы ISO мүшелері арасында декларация болып қалуға тиіс екенін атап өтті.
«ҚазСтандарт» РМК бас директоры Мәлік Сәулебай қабылданған бастама өңір елдерінің жүйелі өзара іс-қимылы мен Орталық Азия мүдделерін халықаралық деңгейде ілгерілету үшін негіз болатынын атап өтті.
— Астана бастамасы – бұл жай ғана декларация емес, техникалық реттеу, тұрақты даму және инновациялар саласындағы күш-жігерді біріктірудің практикалық негізі. Біз өңір елдері бірыңғай тәсілдер әзірлеп, тәжірибе алмасып, жаһандық деңгейде ортақ мүддені ілгерілете алатын платформа құрамыз, — деп атап өтті Мәлік Сәулебай.
Астана бастамасын қабылдау стандарттау саласындағы ынтымақтастықтың өңірлік платформасын қалыптастыруға, институционалдық байланыстарды нығайтуға және Орталық Азия елдерінің халықаралық процестерге қатысуға ортақ тәсілдерін дамытуға маңызды қадам болды.
Құжат сонымен қатар техникалық реттеу, сапа және тұрақты даму саласындағы халықаралық диалог алаңы ретінде Қазақстанның беделінің өсуін көрсетеді.
