13 Маусым 2026
11 маусым күні ҚР СИМ ТРМК «ҚазСтандарт» РМК алаңында азаматтық қорғау және төтенше жағдайлар кезіндегі қауіпсіздік саласындағы жаңа ұлттық стандарттарды енгізуге арналған дөңгелек үстел өтті. Қатысушылар 2026 жылғы 1 қаңтардан бастап күшіне енген стандарттарды практикалық қолдануды талқылады.
Іс-шараға Қазақстан Республикасы Төтенше жағдайлар министрлігінің, Қазақстан Республикасы Қорғаныс министрлігінің, аумақтық департаменттердің және бейінді ұйымдардың өкілдері қатысты.
Үш жаңа стандартқа басты назар аударылды. Бірінші стандарт, ҚР СТ 4015-2025 азаматтық қорғаныстың тез салынатын паналайтын орындарын жобалау, дайындау, орналастыру және пайдалану талаптарын белгілейді. Стандарт ТЖМ бастамасымен әзірленді және азаматтық қорғаныс пен төтенше жағдайлар қызметтерінің қорғаныш инфрақұрылымын жедел өрістетуге дайындығын арттыруға бағытталған.
Сондай-ақ халықты қорғауға арналған жасырын паналар ретінде қолданыстағы үй-жайлар мен құрылыстарды бейімдеу тәртібін айқындайтын ҚР СТ 4016-2025 стандарты қаралды. Стандартта құрылыс конструкцияларына, инженерлік жүйелерге, ғимараттарды тексеруге және жасырын паналардың қорғаныш қасиеттерін күшейтуге қойылатын талаптар қамтылған.
Қатысушылар ҚР СТ 4017-2025 «Атом станциясында жобадан тыс авария болған кезде радиациялық ахуалды бағалау әдістемесі» стандартына да ерекше назар аударды. Бұл стандарт радиоактивті ластану аймақтарын анықтауға, халықтың сәулелену дозаларын есептеуге және ықтимал радиациялық авариялардың салдарларын бағалауға бірыңғай тәсілдерді белгілейді.
Талқылау барысында мамандар жаңа талаптарды практикалық қолдану тетіктерін, азаматтық қорғаныстың қорғаныш құрылысжайлары қорын қалыптастыру және оны әзірлікте ұстап тұру мәселелерін, сондай-ақ төтенше жағдайларда халықтың қауіпсіздігін қамтамасыз етудің заманауи тәсілдерін қарастырды.
Кездесуге қатысушылар атап өткендей, жаңа стандарттарды енгізу мемлекеттік органдар мен ұйымдардың төтенше жағдайларға ден қоюға дайындық деңгейін арттыруға, халықты қорғауды күшейтуге және ұлттық азаматтық қорғау жүйесінің заманауи талаптар мен халықаралық тәжірибеге сәйкес одан әрі дамуын қамтамасыз етуге мүмкіндік береді.
«Азаматтық қорғау туралы» Қазақстан Республикасы Заңының 21-бабына сәйкес азаматтық қорғаныстың қорғаныш құрылыстарын салу және оның қорын жинақтау, оларды әзірлікте ұстап тұру табиғи және техногендік сипаттағы төтенше жағдайлардың салдарынан халық пен аумақтарды қорғаужөніндегі маңызды шаралардың бірі болып табылатынын еске сала кетеміз.