2015 жылғы 30 қарашада Қазақстан Республикасы Дүниежүзілік сауда ұйымының 162-ші мүшесі болды және ДСҰ келісімдерінің барлық талаптарын орындауға өзіне міндеттемелер қабылдады.
ДСҰ-ға мүше елдерде Саудадағы техникалық кедергілер, санитариялық және фитосанитариялық шаралар жөніндегі Ақпараттық орталықтардың болуы негізгі талаптардың бірі болып табылады.
Ақпараттық орталық отандық кәсіпорындарды және барлық мүдделі тараптарды санитариялық және фитосанитариялық шаралар (ДСҰ-ға мүше елдердің аумағында аурулардың өршуіне байланысты өнім импортына уақытша тыйым салуды енгізу немесе алып тастау, өнімді әкелу талаптары мен қағидалары) және саудадағы техникалық кедергілер (ДСҰ-ға мүше елдердің Техникалық регламенттерінің жобалары немесе оларға өзгерістер енгізу, экспорттаушы елдің техникалық талаптары және сәйкестікті бағалау рәсімдері және т.б.) туралы ақпаратпен қамтамасыз етеді. Экспорттаушылардың өнімді басқа елдерге экспорттау үшін қажетті шаралар туралы хабардар болуы Қазақстандық өнімге қатысты кемсітушілік шараларды белгілеудің алдын алуға, саудада техникалық кедергілердің туындау тәуекелдерін азайтуға, сондай-ақ Қазақстан Республикасының аумағында зиянды немесе ауру тудыратын организмдердің енуінен, бекітілуінен немесе таралуынан қорғауға көмектеседі.