Стандарт 2024 жылдың 1 қаңтарынан күшіне енді.
ҚазСтандарттың баспасөз қызметі хабарлағандай, ҚР СТ 2191-2023 «Ақпараттық технологиялар. Мүгедектігі бар адамдар үшін веб-контенттің қолжетімділігі» көру, есту, қозғалыс дағдылары, сөйлеу, когнитивтік қабілеттер, оқудағы қиындықтар және неврологиялық бұзылулар сияқты проблемаларды қоса алғанда пайдаланушылардың әртүрлі қажеттіліктерін ескереді.
"Стандарт тек компьютерлердегі, планшеттердегі және мобильді құрылғылардағы интерфейстерге ғана қолданылмайды. Ол сондай-ақ ұйымдардың желілерінде берілетін интернеттегі және электрондық ресурстардағы ақпаратқа қолданылуы мүмкін. Бұл ресурстарды пайдалану мүмкіндігі шектеулі жандар үшін де, қарт адамдар үшін де ыңғайлы болу үшін маңызды", - деп ведомствода түсіндірді.
Сонымен қатар, стандарт кез келген мәтіндік емес контент үшін балама мәтін беруді көздейді, бұл оны үлкен қаріп, Брайль қаріпі, сөйлеу, символдар немесе өте қарапайым тіл сияқты әр түрлі пайдаланушыларға қолайлы нысандарға түрлендіруге мүмкіндік береді.