ҚазСтандарт Жасыл Академиямен бірлесіп, ЭЫДҰ қолдауымен көміртекті реттеу мен стандарттауды жетілдіру бойынша жемісті онлайн-семинар өткізді
31 January 2022
2022 жылғы 27-28 қаңтар аралығында ҚазСтандарт Жасыл Академиямен бірлесіп, ЭЫДҰ қолдауымен көміртекті реттеу мен стандарттауды жетілдіру бойынша жемісті онлайн-семинар өткізді. Семинарға мемлекеттік органдардан, Қазақстандағы Төмен көміртекті экономикалық даму доктринасын (LED) әзірлеу жөніндегі үкіметтік жұмыс тобынан 130-дан астам өкіл, халықаралық және ұлттық сарапшылар қатысты. Іс-шараны ҚР ҰЭМ Вице-министрі Абзал Әбдікәрімов және ЭЫДҰ PISA жобасының үйлестірушісі Жан-Франсуа Ленгель ашты. Семинар шеңберінде ҚазСтандарт төмен көміртекті реттеуге арналған жасыл стандарттар туралы, парниктік газдар шығарындыларын азайту жөніндегі маңызды іс-шаралар және көміртегі бейтараптылығы жөніндегі мемлекетаралық техникалық комитетті құру бастамасы туралы егжей-тегжейлі айтып берді. Сондай-ақ ЭЫДҰ елдерінің төмен көміртекті даму стратегиясын (LEDS) әзірлеудегі халықаралық тәжірибесі, Қазақстан үшін ESG және көміртегі жобалары және Қазақстандағы LED доктринасының мәртебесі туралы ақпарат ұсынылды. Бұдан басқа Қазақстандағы ESG рейтингісі мәселелері, олар не үшін қажет және олар не береді деген мәселелер талқыланды. Семинар соңында LED доктринасы бойынша ұсынымдар мен талқылаулардың маңыздылығы, осы бағытқа барлық мүдделі тараптардың тартылуы және доктринаны дамыту бойынша бірлескен жұмыс атап өтілді. Іс-шара пікірталас түрінде өтті, осы пікірталаста қатысушылардың барлығы өздерін қызықтырған сұрақтарын қойып, оларға жауаптар алды, сондай-ақ осы жүйені жетілдіру бойынша өз ұсыныстарын ұсынды.